De grege Moesorum, qui me cervice locata Securum iubeant clamoso insistere circo.
Sit mihi praeterea curvus caelator et alter, Qui multas facies pingit cito: sufficiunt haec, Quando ego pauper ero! Votum miserabile, nec spes His saltem; nam quum pro me Fortuna rogatur, Affixit ceras illa de nave petitas,
Quae Siculos cantus effugit remige surdo."
Omnibus in terris, quae sunt a Gadibus usque Auroram et Gangen, pauci dinoscere possunt Vera bona atque illis multum diversa, remota Erroris nebula. Quid enim ratione timemus Aut cupimus? quid tam dextro pede concipis, ut te 5 Conatus non poeniteat votique peracti?
Evertere domos totas optantibus ipsis
Di faciles; no citura toga, nocitura petuntur Militia; torrens dicendi copia multis
Et sua mortifera est facundia; viribus ille
Confisus periit admirandisque lacertis. Sed plures nimia congesta pecunia cura
Strangulat et cuncta exsuperans patrimonia census, Quanto delphinis ballaena Britannica maior.
Temporibus diris igitur iussuque Neronis Longinum et magnos Senecae praedivitis hortos Clausit et egregias Lateranorum obsidet aedes Tota cohors: rarus venit in coenacula miles. Pauca licet portes argenti vascula puri, Nocte iter ingressus gladium contumque timebis Et motae ad lunam trepidabis arundinis umbras: Cantabit vacuus coram latrone viator. Prima fere vota et cunctis notissima templis Divitiae, crescant ut opes, ut maxima toto Nostra sit arca foro. Sed nulla aconita bibuntur Fictilibus; tunc illa time, quum pocula sumes Gemmata et lato Setinum ardebit in auro. Iamne igitur laudas, quod de sapientibus alter Ridebat, quoties de limine moverat unum Protuleratque pedem, flebat contrarius auctor? Sed facilis cuivis rigidi censura cachinni: Mirandum est, unde ille oculis suffecerit humor. Perpetuo risu pulmonem agitare solebat Democritus, quamquam non essent urbibus illis Praetexta et trabeae, fasces, lectica, tribunal. Quid, si vidisset praetorem curribus altis Exstantem et medii sublimem pulvere circi In tunica Iovis et pictae Sarrana ferentem Ex humeris aulaea togae magnaeque coronae Tantum orbem, quanto cervix non sufficit ulla? Quippe tenet sudans hanc publicus et, sibi consul Ne placeat, curru servus portatur eodem.
Da nunc et volucrem, sceptro quae surgit eburno, Illinc cornicines, hinc praecedentia longi Agminis officia et niveos ad frena Quirites, Defossa in loculis quos sportula fecit amicos. Tum quoque materiam risus invenit ad omnes Occursus hominum, cuius prudentia monstrat, Summos posse viros et magna exempla daturos Vervecum in patria crassoque sub aere nasci. Ridebat curas, nec non et gaudia vulgi, Interdum et lacrimas, quum fortunae ipse minaci
Mandaret laqueum mediumque ostenderet unguem. Ergo supervacua aut vel perniciosa petuntur, Propter quae fas est genua incerare deorum. Quosdam praecipitat subiecta potentia magnae Invidiae; mergit longa atque insignis honorum Pagina. Descendunt statuae restemque sequuntur, Ipsas deinde rotas bigarum impacta securis Caedit et immeritis franguntur crura caballis: Iam strident ignes, iam follibus atque caminis Ardet adoratum populo caput et crepat ingens Seianus; deinde ex facie toto orbe secunda Fiunt urceoli, pelves, sartago, matellae. Pone domi laurus, duc in Capitolia magnum Cretatumque bovem: Seianus ducitur unco Spectandus; gaudent omnes: Quae labra, quis illi Vultus erat! numquam, si quid mihi credis, amavi Hunc hominem! sed quo cecidit sub crimine? quisnam Delator? quibus indiciis, quo teste probavit? Nil horum: verbosa et grandis epistola venit A Capreis. Bene habet; nil plus interrogo. — Turba Remi? Sequitur fortunam ut semper et odit Damnatos; idem populus, si Nortia Tusco Favisset, si oppressa foret secura senectus Principis, hac ipsa Seianum diceret hora Augustum. Iam pridem, ex quo suffragia nulli Vendimus, effudit curas; nam qui dabat olim Imperium, fasces, legiones, omnia, nunc se Continet atque duas tantum res anxius optat, Panem et circenses. Perituros audio multos. Nil dubium, magna est fornacula; pallidulus mi Brutidius meus ad Martis fuit obvius aram. Quam timeo, victus ne poenas exigat Aiax
Út male defensus! curramus praecipites et,
Dum iacet in ripa, calcemus Caesaris hostem.
Sed videant servi, ne quis neget et pavidum in ius Cervice obstricta dominum trahat.
Tunc de Seiano, secreta haec murmura vulgi. Visne salutari sicut Seianus? habere
Tantumdem atque illi summas donare curules, Illum exercitibus praeponere? tutor haberi Principis angusta Caprearum in rupe sedentis Cum grege Chaldaeo? vis certe pila, cohortes, Egregios equites et castra domestica? quidni Haec cupias? et qui nolunt occidere quemquam, Posse volunt. Sed quae praeclara et prospera tanti, Ut rebus laetis par sit mensura malorum? Huius, qui trahitur, praetextam sumere mavis, An Fidenarum Gabiorumque esse potestas Et de mensura ius dicere, vasa minora Frangere pannosus vacuis aedilis Ulubris? Ergo quid optandum foret, ignorasse fateris Seianum; nam qui nimios optabat honores Et nimias poscebat opes, numerosa parabat Excelsae turris tabulata, unde altior esset Casus et impulsae praeceps immane ruinae. Quid Crassos, quid Pompeios evertit, et illum, Ad sua qui domitos deduxit flagra Quirites? Summus nempe locus nulla non arte petitus, Magnaque numinibus vota exaudita malignis. Ad generum Cereris sine caede ac vulnere pauci Descendunt reges et sicca morte tyranni.
Eloquium ac famam Demosthenis aut Ciceronis Incipit optare et totis Quinquatribus optat, Quisquis adhuc uno parcam colit asse Minervam, Quem sequitur custos angustae vernula capsae. Eloquio sed uterque perit orator; utrumque Largus et exundans leto dedit ingenii fons.
Ingenio manus est et cervix caesa; nec umquam Sanguine causidici maduerunt rostra pusilli.
O fortunatam natam me consule Romam
Antoni gladios potuit contemnere, si sic Omnia dixisset. Ridenda poemata malo,
Quam te conspicuae, divina Philippica, famae, Volveris a prima quae proxima. Saevus et illum Exitus eripuit, quem mirabantur Athenae Torrentem et pleni moderantem frena theatri.
Dis ille adversis genitus fatoque sinistro, Quem pater ardentis massae fuligine lippus A carbone et forcipibus gladiosque parante Incude et luteo Vulcano ad rhetora misit.
Bellorum exuviae, truncis affixa tropaeis Lorica et fracta de casside buccula pendens Et curtum temone iugum victaeque triremis Aplustre et summo tristis captivus in arcu Humanis maiora bonis creduntur. Ad hoc se Romanus Graiusque et barbarus induperator Erexit: causas discriminis atque laboris
Inde habuit. Tanto maior famae sitis est, quam Virtutis. Quis enim virtutem amplectitur ipsam, Praemia si tollas? patriam tamen obruit olim Gloria paucorum et laudis titulique cupido Haesuri saxis cinerum custodibus, ad quae Discutienda valent sterilis mala robora fici,
Quandoquidem data sunt ipsis quoque fata sepulcris. Expende Hannibalem: quot libras in duce summo Invenies? hic est, quem non capit Africa Mauro Percussa Oceano Niloque admota tepenti, Rursus ad Aethiopum populos altosque elephantos. Additur imperiis Hispania, Pyrenaeum
Transilit; opposuit natura Alpemque nivemque : Diducit scopulos et montem rumpit aceto.
Iam tenet Italiam; tamen ultra pergere tendit: Actum, inquit, nihil est, nisi Poeno milite portas Frangimus et media vexillum pono Subura. O qualis facies et quali digna tabella, Quum Gaetula ducem portaret bellua luscum! Exitus ergo quis est? o gloria! vincitur idem
Nempe et in exilium praeceps fugit atque ibi magnus 160 Mirandusque cliens sedet ad praetoria regis, Donec Bithyno libeat vigilare tyranno.
Finem animae, quae res humanas miscuit olim, Non gladii, non saxa dabunt, nec tela, sed ille Cannarum vindex et tanti sanguinis ultor
Annulus. I demens et saevas curre per Alpes,
« PreviousContinue » |