ODE XII

NEOBULE SECUM LOQUITUR

Miserarum est neque amori dare ludum, neque dulci Mala vino lavere, aut exanimari, metuentes

Patruæ verbera linguæ.

Tibi qualum Cythereæ puer ales, tibi telas,
Operosæque Minerva studium aufert, Neobule,
Liparæi nitor Hlebri,

Simul unctos Tiberinis humeros lavit in undis,
Eques ipso melior Bellerophonte, neque pugno
Neque segni pede victus;

Catus idem per apertum fugientes agitato
Grege cervos jaculari et celer arcto latitantem
Fruticeto excipere aprum.