Acmen Septimius, suos amores, Tenens in gremio, Mea, inquit, Acme, Ni te perdite amo, atque amare porro Omnes sum assidue paratus annos, Quantum qui pote plurimum perire ; Solus in Libya, Indiâve tostâ, Casio veniam obvius leoni.
Hoc ut dixit, Amor, sinistram ut ante, Dextram sternuit approbationem. At Acme leviter caput reflectens, Et dulcis pueri ebrios ocellos Illo purpureo ore suaviata, Sic, inquit, mea vita, Septimille, Huic uno domino usque serviamus, Ut multo mihi major acriorque Ignis mollibus ardet in medullis. Hoc ut dixit, Amor, sinistram ut ante, Dextram sternuit approbationem. Nunc, ab auspicio bono profecti, Mutuis animis amant, amantur. Unam Septimius misellus Acmen Mavolt, quam Syrias Britanniasque : Uno in Septimio fidelis Acme Facit delicias, libidinesque.
Quis ullos homines beatiores
Vidit? quis Venerem auspicatiorem?
Ad se ipsum, de Adventu Veris.
Jam ver egelidos refert tepores; Jam cœli furor æquinoctialis Jucundis Zephyri silescit auris. Linquantur Phrygii, Catulle, campi, Nicææque ager uber æstuosæ. Ad elaras Asiæ volemus urbes. Jam mens prætrepidans avet vagari; Jam læti studio pedes vigescunt. O dulces comitum valete cœtus, Longe quos simul a domo profectos Diverse variæ viæ reportant.
Ad Porcium et Socrationem.
Porci et Socration, duæ sinistræ Pisonis, scabies famesque Memmî, Vos Veranniolo meo et Fabullo Verpus præposuit Priapus ille? Vos convivia lauta sumtuose De die facitis; mei sodales Quærunt in triviis vocationes?
Mellitos oculos tuos, Juventi, Siquis me sinat usque basiare,
Usque ad millia basiem trecenta,
Nec unquam saturum inde cor futurum est; Non si densior aridis aristis
Sit, nostræ seges osculationis.
Disertissime Romuli nepotum,
Quot sunt, quotque fuêre, Marce Tulli, Quotque post aliis erunt in annis; Gratias tibi maximas Catullus
Agit, pessimus omnium poëta;
Tanto pessimus omnium poëta, Quanto tu optimus omnium patronus.
Hesterno, Licini, die otiosi Multum lusimus in meis tabellis, Ut convenerat esse; delicatos Scribens versiculos, uterque nostrûm Ludebat numero modo hoc, modo illoc, Reddens mutua per jocum atque vinum. Atque illinc abii, tuo lepore Incensus, Licini, facetiisque, Ut nec me miserum cibus juvaret, Nec somnus tegeret quiete ocellos, Sed toto indomitus furore lecto Versarer, cupiens videre lucem,
Ut tecum loquerer, simulque ut essem. At defeṣsa labore membra postquam Semimortua lectulo jacebant,
Hoc, jucunde, tibi poëma feci, Ex quo perspiceres meum dolorem. Nunc audax, cave, sis; precesque nostras, Oramus, cave, despuas, ocelle,
Ne pœnas Nemesis reposcat a te:
Est vehemens Dea; lædere hanc caveto.
Ille mî par esse Deo videtur, Ille, si fas est, superare Divos, Qui sedens adversus identidem te Spectat et audit
Dulce ridentem; misero quod omnes Eripit sensus mihi: nam simul te, Lesbia, adspexi, nihil est super mî
Lingua sed torpet: tenuis sub artus Flamma dimanat: sonitu suopte Tintinant aures: geminâ teguntur Lumina nocte.
Otium, Catulle, tibi molestum est; Otio exsultas, nimiumque gestis: Otium et reges prius, et beatas Perdidit urbes.
Ad se ipsum, de Strumâ et Vatinio.
Quid est, Catulle, quid moraris emori? Sellâ in curuli Struma Nonius sedet:
Per consulatum pejerat Vatinius.
Quid est, Catulle, quid moraris emori?
Risi nescio quem modo in coronâ, Qui, cum mirifice Vatiniana Meus crimina Calvus explicâsset, Admirans ait hæc, manusque tollens: Dî magni, salaputium disertum!
Othonis caput oppido pusillum, Vetti, rustice, semilauta crura, Subtile et leve peditum Libonis ; Si non omnia displicere vellem Tibi, et Fuffitio seni recocto. Irascêre iterum meis iambis Immerentibus, unice imperator.
Oramus, si forte non molestum est, Demonstres ubi sint tuæ tenebræ. Te quæsivimus in minore campo, Te in circo, te in omn bus libellis, Te in templo superi Jovis sacrato,
« PreviousContinue » |