quand j'y demeurerois, que seroit ce? Ne pouvant reigler les evenemens, je me reigle moy-mesme ; et m'applique à eux, s'ils ne s'appliquent à moy. Je n'ay guiere d'art pour sçavoir gauchir la fortune et luy eschapper ou la forcer, et pour dresser et conduire par prudence les choses à mon point. J'ay encore moins de patience pour supporter le soing aspre et penible qu'il faut à cela; et la plus penible assiete pour moy, c'est estre suspens és choses qui pressent, et agité entre la crainte et l'esperance. Le deliberer, voire és choses plus legieres, m'importune; et sens mon esprit plus empesché à souffrir le branle et les secousses diverses du doute et de la consultation, qu'à se rassoir et resoudre à quelque party que ce soit, aprés que la chance est livrée. Peu de passions m'ont troublé le sommeil; mais, des deliberations, la moindre me le trouble. Tout ainsi que des chemins, j'en evite volontiers les costez pandans et glissans, et me jette dans le battu le plus boueux et enfondrant, d'où je ne puisse aller plus bas, et y cherche seurté: aussi j'ayme les malheurs tous purs, qui ne m'exercent et tracassent plus aprés l'incertitude de leur rabillage, et qui du premier saut me jettent droictement en la souffrance. Aux evenemens je me porte virilement, en la conduicte puerillement l'horreur de la cheute me donne plus de fiebvre que le coup. Le jeu ne vaut pas la chandelle l'avaritieux a plus mauvais conte de sa passion que n'a le pauvre, et le jaloux que le cocu; et y a moins de mal souvant à perdre sa vigne qu'à la plaider. La plus basse marche est la plus ferme : c'est le siege de la constance; vous n'y avez besoing que de vous; elle se fonde là, et appuye toute en soy. Cet exemple d'un gentil'homme que plusieurs ont cogneu a il pas quelque air philosophique? Il se maria bien avant en l'aage, ayant passé en bon compaignon sa jeunesse, grand diseur, grand gaudisseur. Se souvenant combien la matiere de cornardise luy avoit donné dequoy parler et se moquer des autres, pour se mettre à couvert, il espousa une femme qu'il print au lieu où chacun en trouve pour son argent, et dressa avec elle ses alliances: «Bon jour, putain;-Bon jour, cocu»; et n'est chose dequoy plus souvent et ouvertement il entretint chez luy les survenans que de ce sien dessein : par où il bridoit les occultes caquets des moqueurs, et esmoussoit la pointe de ce reproche. Quant à l'ambition, qui est voisine de la presumption, ou fille plustost, il eut fallu, pour m'advancer, que la fortune me fut venu querir par le poing; car de me mettre en peine pour un' esperance incertaine, et me soubmettre à toutes les difficultez qui accompaignent ceux qui cerchent à se pousser en credit sur le commencement de leur progrez, je ne l'eusse sceu faire : Spem pretio non emo. Je m'atache à ce que je voy et que je tiens, et ne m'eslongne guiere du port: Alter remus aquas, alter tibi radat arenas. Et puis on n'arrive guiere à ces avancements qu'en hazardant premierement le sien; et je suis d'advis que, si ce qu'on a suffit à maintenir la condition en laquelle on est nay et dressé, c'est folie d'en lâcher la prise sur l'incertitude de l'augmenter. Celuy à qui la fortune refuse dequoy planter son pied et establir un estre tranquille et reposé, il est pardonnable s'il jette au hazard ce qu'il a, puis qu'ainsi comme ainsi la necessité l'envoye à la queste. Et j'excuse plustost un cabdet de mettre sa legitime au vent, que celuy à qui l'honneur de la maison est en charge, qu'on ne peut voir necessiteux qu'à sa faute. J'ay bien trouvé le chemin plus court et plus aisé, avec le conseil de mes bons amis du temps passé, de me défaire de ce desir et de me tenir coy; Cui sit conditio dulcis sine pulvere palmæ : jugeant aussi bien sainement de mes forces, qu'elles n'estoient pas capables de grandes choses, et me souvenant de ce mot du feu chancelier Olivier, «< que les François sembloient des guenons qui vont grimpant contremont un arbre, de branche en branche, et ne cessent d'aller jusques à ce qu'elles sont arrivées à la plus haute branche, et y monstrent le cul quand elles y sont. >> Turpe est, quod nequeas, capiti committere pondus, Les qualitez mesmes qui sont en moy non reprochables, je les trouvois inutiles en ce siecle. La facilité de mes meurs, on l'eut nommée lâcheté et foiblesse; la foy et la conscience s'y fussent trouvées scrupuleuses et superstitieuses; la franchise et la liberté, importune, inconsiderée et temeraire. A quelque chose sert le mal'heur. Il fait bon naistre en un siecle fort depravé; car, par comparaison d'autruy, vous estes estimé vertueux à bon marché. Qui n'est que parricide en mon temps et sacrilege, il est homme de bien et d'honneur: Nunc, si depositum non inficiatur amicus, et ne fut jamais temps et lieu où il y eust pour les princes loyer plus certain et plus grand proposé à la bonté et à la justice. Le premier qui s'avisera de se pousser en faveur et en credit par cette voye là, je suis bien deceu si à bon conte il ne devance ses compaignons. La force, la violance, peuvent quelque chose, mais non pas tousjours tout. Par cette proportion, j'eusse esté moderé en mes vengeances, mol au resentiment des offences, trésconstant et religieux en l'observance de ma parolle, ny double, ny soupple, ny accommodant ma foy à la volonté d'autruy et aux occasions : j'eusse plustost laissé rompre le col aux affaires que de plier ma foy et ma conscience à leur service. Car, quant à cette nouvelle vertu de faintise et de dissimulation qui est à cest' heure si fort en credit, je la hay capitallement; et, de tous les vices, je n'en trouve aucun qui tesmoigne tant de lâcheté et bassesse de cœur. C'est un' humeur couarde et servile de s'aller desguiser et cacher sous un masque, de n'oser se faire veoir tel qu'on est, et de n'oser montrer en publicq son visage. C'est par là que nos hommes se dressent à la perfidie estants duicts à produire des parolles fauces, ils ne font pas conscience d'y manquer. Un cœur genereux et noble ne doit point desmentir ses pensées; il se veut faire voir jusques au dedans tel qu'il est, car il n'y a rien qui ne soit digne d'estre veu. Apollonius disoit que c'estoit aux serfs de mantir, et aux libres de dire verité. Il ne faut pas tousjours dire tout, car ce seroit sottise; mais ce qu'on dit, il faut qu'il soit tel qu'on le pense, autrement c'est meschanceté. Je ne sçay quelle commodité ils attendent de se faindre et contrefaire sans cesse, si ce n'est de n'en estre pas creus lors même qu'ils disent verité, cela peut tromper une fois ou deux les hommes; mais de faire profession de se tenir couvert, et se vanter, comme ont faict aucuns de nos princes, qu'«< ils jetteroient leur chemise au feu si elle estoit participante de leurs vrayes intentions », qui est un mot de l'ancien Metellus Macedonicus, et que « qui ne sçait se faindre ne sçait pas regner », c'est tenir advertis ceux qui ont à les praticquer que ce n'est que piperie et mensonge qu'ils disent. Ce seroit une grande simplesse à qui se lairroit amuser ny au visage ny aux parolles de celuy qui faict estat d'estre tousjours autre au dehors qu'il n'est au dedans, comme faisoit Tibere; et ne sçay quelle part telles gens peuvent avoir au commerce des hommes, ne produisans rien qui soit receu pour argent contant. Qui est desloyal envers la verité l'est aussi envers le mensonge. Or, de ma part, j'ayme mieux estre importun et indiscret que flateur et dissimulé. J'advoue qu'il se peut mesler quelque pointe de fierté et d'opiniastreté à se tenir ainsin entier et ouvert sans consideration d'au |