JASHAR FRAGMENTA ARCHETYPA CARMINUM HEBRAICORUM IN MASORETHICO VETERIS TESTAMENTI TEXTU PASSIM TESSELLATA COLLEGIT, ORDINAVIT, RESTITUIT, IN UNUM CORPUS REDEGIT, LATINE EXHIBUIT, COMMENTARIO INSTRUXIT JOANNES GUILELMUS DONALDSON S. THEOLOGIAE DOCTOR; COLLEGII SS. TRINITATIS APUD CANTABRIGIENSES PROSTAT LONDINI APUD WILLIAMS ET NORGATE. BEROLINI APUD WILHELM HERTZ. Quamquam te, vir doctissime, nondum coram vidi, id nec tua culpa accidit, nec mea. Memini enim, quum in celeberrimo S. Trinitatis apud Cantabrigienses Sodalitio censebar, tu autem Academiae illius invisendae causa ad D. F. Gregorium, ejusdem Collegii Socium, discipulum olim meum, mihique, dum vivus fuit, amicissimum diverteras, me arcessitum fuisse ut te apud eum convenirem. Quum autem foris abessem unicam illam tui cognoscendi occasionem perdidi. At enim vero ea est hominum litteratorum familiaritas, ut domesticam societatem non deposcat. Et si quis alius, equidem te sine nomenclatore appellare ausim. Nam fere aequales aetate — didici enim ex curriculo vitae tuae tractationi de tabulis Eugubinis addito te dumtaxat sex mensibus provectiorem esse - per multos annos easdem philologiae regiones peragravimus; neque quisquam est in quo |