Vita.

Natus sum Carolus, Guilelmus, Eginhardus, Hans Felix a. d. IV. Nonas Octobris a. h. s. LXII in oppido Aken ad Albim. fidem profiteor evangelicam. primis literarum elementis imbutus inde ab anno LXXIV usque ad annum LXXXII gymnasium adii Halense, quod Latina nominatur. maturitatis testimonio instructus civis factus sum universitatis Fridericianae Halensis cum Vitebergensi consociatae ibique per octies sex menses studiis incubui philologicis, theodiscis, historicis. scholas autem audivi virorum illustrissimorum prff. doctt. Bartholomae, Burdach, Dittenberger, Duemmler, Erdmann, Gering, Gosche, Haym, Hertzberg, Hiller, Uphues, Zacher. Praeterea benigne permiserunt mihi viri doctissimi Keil, Hiller, Dittenberger prff. ut seminario philologico interessem per quater sex menses. omnibus illis, quos nominavi, viris optime de me meritis gratias et nunc ago et semper habebo quam maxumas.